يوميات رمضان.. 5
واحنا صغار بالمدرسة كانوا يعلمونا إنه الصيام هو لحتى نحس بالفقراء والمحتاجين اللي ما عندهم قوت يومهم.. هاد صحيح لكن مش كافي.. رمضان إجا لكتير أسباب منها الإحساس بالمحتاجين.. بس الأكتر من هيك إنه نحس بكل من شارك وتعب لحتى يكون على طاولتنا الوجبة اللي بنفطر عليها آخر النهار.. احكوا لأولادكم قصة الراعي اللي بربي المواشي.. والفلاح اللي زرع الخضرا والفواكه.. والخباز اللي حضر الخبز.. والحفار اللي حفر بير المي لنشرب.. والقائمة طويلة إذا فكرت بكل تفصيل.. وانت.. انت اللي تعبت واشتغلت طول النهار لحتى تجيب مصروف هالإفطار.. والأهم من هاد كله.. الله اللي أنعم عليك من نعمه ورزقه لحتى تلاقي طعام وشراب إفطارك.. ولأنه أنعم عليك.. صار واجبك هلأ إنه مو بس تحس بالمحتاجين وكمان خليهم يشاركوا معك النعمة والجهد اللي انت بذلته واللي بذله كل أصدقاءنا الراعي والفلاح والخباز والحفار.. علموا أولادكم العطاء.. قولوا لأولادكم تعالوا نحضر وجبة لجارنا الختيار ما عنده حدا.. أو الأرملة والأيتام اللي بالبناية جنبنا.. أو الطالب اللي بيشتغل طول النهار وبيدرس طول الليل..
احكوا لأولادكم قصص الخير والتكافل.. وشجعوهم على العطاء بأيديهم.. لأنه رمضان تكافل..
مع محبتي...
رندة...
#يوميات_رمضان
#يوميات_من_القلب
No comments:
Post a Comment